نفسى تفضل

هى ليه مصر اللى غالية
عندى شايفانى رخيص ؟؟
اللى بافديها بدمى
واللى قلت عليها أمى
واللى ويلها هو همى
واللى أحزانها بتقتل
فيا صوتى
واللى لو قالت حزينة
باحس موتى
واللى لو سالت دموعها
تسيل فى عيني
واللى لو داقت ألمها
تغور سنيني
ليه يا مصر بقيتي قاسية
زى ناس مش هم أهلك
ليه بقيتي بتقتلي اللى يشيل عذابك
قبل سهلك
اه يا مصر
يا اللى كنتى نوارتها فى كل عصر
يا اللى نورتى الليالى
يا اللى حليتى البحور
يا اللى خليتي اللى ميت
يبتسم جوة القبور
يا اللى علمتى الحقيقة
كل معنى للظهور
يا اللى زودتى السعادة
يا اللى عرفتى الحبور
يا اللى حليتى البنفسج
يا اللى فتحتى الزهور
يا اللى كنتى ويا اللى كنتى
قبل ما يجيلك دمارك
قبل ما يحكم علينا
بنتحارنا وبانتحارك
قبل ما يخلق بإيده النجسة عارك
قبل ما يبيعك ... ويرضى بالخسارة
قبل ما ينتور فى لحمك
جنب باب أوسخ سفارة
قبل ما يحكم عليكي ويحكمك
قبل ما يضلم نهارك ...
يشكمك
قبل ما يكتم نفسنا
ويكتمك
قبل ما الإيد اللى أكلت من ترابك
تترسم خط فى خدودك
تترسم نجمة فى حدودك
تترسمة شوكة فى عودك
آه يا مصر ... وآه يا مصرى
كل مصرى وله أوان
اللى طيب .. واللى مجدع
واللى ندل وألعبان
واللى يسرق ... واللى يحرق
واللى يهدى الأمريكان
واللى يضرب .. واللى يهرب
والشجاع زى الجبان
كل كلب وله أوانه
مهما خباه صولجان
إنت مثلاً ...
أيوة إنت يا اللى عارف انت مين
يوم زفافك ع البلد دي
كان فضيحة وعار وشين
من يوميها وانت راكب
بس مش عارف تسوق
من يوميها وإنت لينا
زى ميت مليون خازوق
فين لياليك يا فاروق
فين نيرون ؟؟
وللا هتلر ؟؟
وللا حتى العم كسرى
وللا قيصر
وللا نابليون ومينو
اللى أسلم ..
وإنت كفرك جوة دمك
لم يغادر
من يوميها وانت غادر
بس قادر
من يوميها واحنا ناس
متكممة
بس بنصيبها وخوفها
مسلمة
ناخد القلمين ... ونطمع
اننا ناخد تلاتة
شعب ماشى فى وسط حلبة
تاتا تاتا
وانت مبسوط رغم إنك
عارف إن الناس خلاص
طقت جنابها
ربع قرن بحاله ساكتة
قولى لى إيه بس اللى نابها
والأكادة ....
اتفضحت خلاص يا غالى
يا اللى كنت فى برج عالى
اتفضحت ... وسيبنى أدعى
إن يوم الثورة ييجى
حتى لو كان مش بإيدي
يحتفل بيه بعد منى
إبنى ... ويزقطط حفيدى
آه يا ظالم ...
دعوة المظلوم بتطلع
رغم أمنك ... أو نفوذك
قول لى فين ممكن هاتهرب
لما رب الناس يعوزك
وقتها ... يا ويل جنابك ...
شوف بقى إيه راح يصيبك
قول لى مين من مظلومينك
راح يخافك ... أو يسيبك
وسط كل الناس يا غالى
ربنا الجبار يجيبك
تتسئل عن كل واحد
كله معروف ... كله باين
قول لى كيف تنفع مباحث
وللا إيه تعمل كماين ؟؟
نفسى تفضل طول حياتك
تظلم الناس ... زى عادتك
لجل لما تموت جنابك
ثم تتحاسب سعادتك
تعرف ان الدنيا فانية
والحساب يوم الحساب
إنت ... والشلة الكبيرة ...
إنت ومعاك الكلاب