عيد الحب

يمر علينا أول عيد
وقلبى وقلبك اسم الله
هايحسدنا أكيد كيوبيد
ولا يأثرش إن شالله
حبيبتى كل يوم بيمر
باعشق ضيك الهادى
ويحلو فى عيونى المر
لما عليا بتنادى
فى عيد الحب باهمسلك
وباكتبلك كلام يتعاش
خطاوى الفجر ترسملك
أمل يكبر ... مايتخباش
**********
ح تصدقي ؟؟؟
زي النهاردة من سنة
تصدقى ؟؟؟؟
بدأت شرارة حبنا
تصدقى ؟؟
صوتك وهمسك وابتسامك
كان بداية ملونة
دخلت حياتى وخلت العمر الحزين
يطرح هنا
تصدقى ؟؟؟؟
الحب عيده يا حبيبتى
عشان هوانا بيترسم
والفرح بينا اذا ابتسمنا
بكل رقة بيتقسم
والحزن ... حتى الحزن فينا
بيبتسم
تصدقى ....
الورد الاحمر كله غيران
من خدودك
والفل نفسه يكون خيال
على ضل عودك
والنرجس المكسوف قوى
نفسه يكون حارس أمين
يحرس حدودك
تصدقى ....
أنا كنت إيه وصبحت ايه
لما اتقابلنا
وإزاى شموس فرح وهنا
طلت فى ليلنا
وإزاى على حب وحنان
أنا وانتى ميلنا ؟؟
يشهد علينا بلوجنا ....
ويقر ميلنا
شفتى الخطاوى اتجمعت
إزاى فى لحظة ؟؟؟
أنا لما شفتك من سنة
حبيت فى لحظة
وعينيكي كانت واخدة بالها
من هوايا وكات ملاحظة
تصدقى ...
عيد الهوى ....
وحياة عينيكي الحلوة
عادى فات عليا كأى يوم
علشان هوانا فى قلبنا
دايما بيكبر كل يوم
كل الليالى علينا أعياد حب حلوة
حتى لو شيلنا سوا كل الهوم
نلقى الهموم تطرح أغانى مزهرة
نلقى الألم ...
يطرح أمانى مخضرة
والدمع يروى بينا حلم
وضحكة صافية معطرة
مين اللى قال الحب له عيد
يوم محدد فى السنة
مين اللى يحكم بالتاريخ
لحظة ميلاد السوسنة ؟؟
مين اللى يربط فى النتيجة
أحلى لحظات الهنا
الحب عيده كل يوم
يمر بين اتنين أحبة
الحب عيده ضحكة حلوة
مستحيل يوم تستخبى
الحب عيده إنى اشوفك
حتى لو فتفوتة .. حبة ...
الحب هو إنك وأنا
نلعب سوا ... والدنيا لعبة
الحب هو أنك وأنا
نبقى ابتسامة فرح شابة ...
تصدقى ....
كل البشر ماشيين بورد أحمر هدايا
وكأن يوم من شهر صار
هو الأمل ... هو الحكاية
طيب وباقى العام خلاص ؟؟
وللا إنتى رأيك مش معايا ؟؟؟
عارفة الهنا ؟؟؟
أنا شفته يوم واقف حزين
وسألته مالك ؟؟؟
قال لى بيدور عليكي من سنين
عارفة الهنا ؟؟
أنا عيشته لحظة ماتقابلنا من سنة
عيد الهوى ؟؟؟
يارب يجمع شملنا ...
يديكي خير وكمان يزيدك ...
عيد الهوى ؟؟؟
إنتى فى قلبى بألف عيد
ويا رب أكون فى القلب عيدك