ترجم
هذه الصفحة
مجروح من الوطن
مجروح من الاحباب
صار الوطن كفن
مقفول عليا الباب
يا غربة جوة دارى
بطول ليلي ونهارى
جرح القلب اللى سارى
من ساعة العصارى
لحد تاني يوم
يا كل عتاب ولوم
يا زقزقات البوم
تعالى وزقزقيلي
زيك مسموع عويلى
عويل دموع وشوم
محراب الآه صلاتى
مجنونة يا ذكرياتي
باصلى لك يوماتي
يمكن جرحي يزول
القى العمر اللى آتى
زي العمر اللى ماضى
اسكت يسكت سكاتى
وأقول من غير ما أقول
يا شمس منورالنا
قوليلنا إيه جرالنا
جوابنا مش جوابنا
وسؤالنا غير سؤالنا
وبرغمك يا ديباجة
مش فاهمين اى حاجة
ولا عارفين اى حاجة
عايشين حياة كبيرة
بمنتهى السذاجة
عاملين عايشين فى فرحة
والنار فى القلب قارحة
يا بلادى يا لابسة طرحة
بتخبي دموع وحيرة
وويل وحاجات كتيرة
وانا زيك حزني مالى
قلبى ومالى حالى
ولا من جاوب سؤالى
يا بلادى غير ترابك
مقفول عليا بابك
نفسي ابتسم بفرح
من غير ما يطل جرح
من جوة الابتسامة
ويسيب فى الروح علامة
مليانة بالملامة
مليانة بالندامة
مليانة بالألم
جرحي ورقة وقلم
تنزف حرف اتقتل
وفى تربته اتسأل
فقال ربي العذاب
ونبيي فرح شاب
وديني حريتي
سرقوه مني الكلاب
يا خسارتك يا شباب
ضيعتك فى الأماني
لو ترجع ليا تاني
كنت احضنك فى عيني
واخبيك جوة منى
فى العين ... وجوة ننى
ويا روحي لو تئنى
أقول لك إني تاني
مخلوق .. مانيش أنانى
لكن بحب نفسي
ويومي زي أمسي
مخنوق فيه الحقيقة
نفسي الطاهرة البريئة
بتحن ليوم يفرح
مايتعنبيش ويجرح
ولا فيا الآهة تسرح
تاهت منى الملامح
والوش ماعادش واضح
يا رب اغفر وسامح
يا رب اغفر وسامح
يا رب اغفر وسامح
Subscribe to:
Post Comments (Atom)
No comments:
Post a Comment