قلبك واجعك

قلبـــَــــك واجعـــَـــك
by Ahmad Mokhtar on Sunday, June 19, 2011 at 7:51pm

قلبـــَــــك واجعـــَـــك

قلبي واجعني

انت يا صاحبي يا اللى سامعني

لو تبكيني فى عتمة ليلك

لو تصرخني .. لو تدمعني

هشعر بيك نازل من عيني

حرقة قلبك دي بتكويني

وبإحساسى .. وبتكويني

هاجري عليك .. فبلاش تمنعنى

صاحبي يا صاحبي

يا اللى معايا كنت بتحبي

يا اللى سهرنا الليل نتسامر

فرح نبين ....

دمع نخبي

يا اللى الحزن الساكن قلبك

نفس الحزن الساكن قلبي

يا اللى شعورك

صوتك .. نورك

صمت قبورك

منى .. بسببي

يا اللى فى فرحي كنت معايا

وقسمت الأحزان ويايا

مطمعتش يوم تاخد فرحي

ولا قلت فى حزني كدة كفاية

دايما شايل همي وماشي

كلمة لأ مابتقولهاشي

لما اكتب بتقول لي يا شاعر

وأما اسكت ... بتقول لى يا صابر

وأما اظلم بتقول لى يا قادر

وأما أديلك فضلة خيرك

بتسيبهالى

ما تاخدهاشي

صاحبي يا صاحبي يا عارف نفسك

وانا عارف كل اللى فى نفسك

لو بكلامي جرحتك مرة

وللا ظلمتك .. وللا حبستك

حقك فوق راسي ماتزعلشي

سامح واغفر .. لأ .. ما تشيلشي

دة أنا منك ... والحزن دابحني

واللى ما بينا مايتقدرشي

أنا مجروح بيك أو من غيرك

لو تستحمل .. كتر خيرك

لو تعرف والله لاتغفرلي

وهاسيبك لله .. لضميرك