ترجم
هذه الصفحة
فى القلب دمعة منبتة
والزرع طالع م العيون
جوة الفؤاد متثبتة
مروية من حزن وجنون
فى القلب فرحة متفتفتة
متكسرة .. مابتتجبرش
سقعانة موت .. متكلفتة
محتاجة صبر مايتصبرش
***********
عطشان قوي ... عطشان أمل
جعان قوي .. جعان لقا
شايل قوي .. حمل الجبل
مشتاق لشمس مشقشقة
ليه تايهة فى عيوني الجمل
هربان من السطر الكلام
لو شاف حنيني .. ودمعتى
وهرب وخاف .. فلا يلام
***********
الرحمة يا سنين الوجع
هو إنتى إيه ؟؟ مابتتعبيش ؟؟
قلبي اللى داير يتوجع
وبقول له داري .. مابيداريش
صوتي اللى راح .. وصداه رجع
ولا جاب معاه غير الصدى
شايفه كطير .. رفرف .. وقع
كان نفسه يوصل للمدى
***********
قاعد لوحدي فى غربتى
وحداني وسط بشر كتير
على وشي راسم ضحكتى
وعينيا للويل ألف بير
يا رب فرج كربتي
واكسر فى قلبي دا الصنم
حيرتي .. وسكاتي .. ودمعتى
همى .. وحزني ... والألم
***********
قنديلي ... لسة بيرتعش
من ريح متعرفش السكون
وهمومي لسة بتتنفش
مايكفيهاش ولا ألف كون
فكرت قلبي خلاص فرح
أتاريها راحة من الشجون
أنا زي لعيب انفرد
بالمرمى ... بس ماجابش جون
Subscribe to:
Post Comments (Atom)
No comments:
Post a Comment